A A A
« Desember »
S M Ţ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Atburđir

13. febrúar 2013 - Ingvar Örn Ákason

Mikil bćting í síđari leik 2.flokks

Uppeldisfélag Sćvars var í heimsókn
Uppeldisfélag Sćvars var í heimsókn
2.flokkur Harðar lék um helgina tvo leiki gegn toppliði ÍR í 2.deildinni. Fyrri leikurinn sem fór fram á laugardeginum var erfiður svo ekki sé meira sagt en eftir að hafa verið tólf mörkum undir í hálfleik (6-18) kom smá kafli þar sem liðið kom smá til baka en aldrei til að gera leikinn spennandi. Leikar enduðu á laugardeginum 16-34 gestunum í vil.

Sunnudagsleikurinn var öllu meiri leikur og mikil spenna einkenndi miðbik leiksins. Heimamenn lentu fyrst 0-6 undir og svo 6-12 en gáfust aldrei upp. Staðan í hálfleik var 15-16 ÍR-ingum í hag og Harðverjarnir komnir á fínt ról. Síðari hálfleikur hófst með sama krafti og sá fyrri endaði en liðið náði að jafna metin í 17-17 áður en langt var liðið af síðari hálfleiknum. Undir restina misstu heimamenn aðeins tökin enda búnir að elta forskot gestanna í rúmar 50 mínútur. Lokatölur 26-34, Breiðhyltingum í vil, en klárt mál að þessi síðari leikur var allt annar en sá fyrri.

Næstu leikir 2.flokks eru í Reykjavík helgina 9.-10.mars næstkomandi og næstu heimaleikir liðsins eru svo helgina 16.-17.mars en þá mæta HK-ingar í heimsókn. 

Áfram Hörður!
8. febrúar 2013 - Ingvar Örn Ákason

Leikir helgarinnar hjá Herđi - allir á völlinn

Strákarnir eru klárir í slaginn og vonast eftir fínu peppi úr stúkunni!
Strákarnir eru klárir í slaginn og vonast eftir fínu peppi úr stúkunni!
Við viljum minna á leiki helgarinnar sem verða hjá 2.flokki félagsins. Liðið leikur nú tvo heimaleiki gegn fornfrægu handboltaliði ÍR en þeir koma í heimsókn í Torfnesið okkar fína um helgina.

Síðasti leikur gegn ÍR-ingunum tapaðist nokkuð örugglega en liðið bætti sig mikið í síðasta leik gegn Víkingum og stefnan er að halda því áfram og gera jafnvel enn betur nú!

Áhorfendur skipta oft miklu máli í þessu og vonandi fáum við góðan stuðning um helgina. Fyrri leikurinn er kl. 12:00 á laugardag og sá síðari kl. 14:00 á sunnudag! 

Allir á völlinn. Frítt inn. Áfram Hörður! 
5. febrúar 2013 - Ingvar Örn Ákason

2.flokkur á réttu róli

2.flokkur Harðar lék um helgina hörkuleik gegn Víkingum í fyrsta heimaleik ársins. Andrúmsloftið í Torfnesi var rafmagnað og ljóst að bæði lið myndu selja sig dýrt í þessum harða slag tveggja liða sem eru mjög áþekk að getu. Heimapiltar héldu yfirhöndinni eftir 30 mínútna leik en staðan í hálfleik var 16-15 Harðverjum í vil.  

Lokaspretturinn var æsilegur og eftir harða og mikla baráttu enduðu leikar á þann veg að gestirnir úr Fossvoginum unnu góðan tveggja marka sigur 29-31. Þessi frammistaða okkar pilta var mikil bæting frá síðustu leikjum og vonandi að liðið haldi áfram á þessari braut. Næstu tveir leikir liðsins eru heimaleikir en þeir fara fram í Torfnesi laugardaginn 9.febrúar og sunnudaginn 10.febrúar.

Laugardagur 9.febrúar

Hörður-ÍR kl. 12:00

Sunnudagur 10.febrúar

Hörður-ÍR kl. 14:00 

Allir á völlinn og hvetjum liðin okkar saman til sigurs. Alltaf frítt inn á leiki yngri flokkanna þannig að við viljum endilega fá ykkar stuðning!

Áfram Hörður! 
5. febrúar 2013 - Ingvar Örn Ákason

5.flokkur Harđar lék fjóra leiki um helgina

Strákarnir kátir eftir fyrri keppnisdaginn
Strákarnir kátir eftir fyrri keppnisdaginn
« 1 af 2 »
5.flokkur Harðar hélt suður á bóginn um nýliðna helgi til að leika 4 leiki á þriðju Íslandsmótstúrneringu þessa aldursflokks. Mótherjarnir að þessu sinni voru HK3, Fram, ÍR2 og Grótta2. Leikið var á Ásvöllum í Hafnarfirði og gist í skólastofu þar rétt hjá.

Fararstjórar hópsins að þessu sinni voru þeir Gunnar Páll og Kristinn og sáu þeir til þess að engum leiddist í ferðinni, hvorki á milli leikja né á kvöldin þar sem hópurinn horfði saman á vídjó, fór í sund, horfði á hörkuflottan handboltaleik í úrvalsdeild kvenna og fleira og fleira.

Enginn sigur komst í hús að þessu sinni en drengirnir börðust þó fyrir sínu í leikjunum og stóðu sig vel. Axel Sveinsson fór með hópnum suður en hann var í þjálfarahlutverkinu að þessu sinni og sá um að halda mönnum á tánum.

Fyrsti leikurinn tapaðist 14-18 gegn HK3 en drengirnir gerðu mjög vel í síðari hálfleik og komu þá vel til baka eftir ögn rólegri byrjun. Næsti leikur var gegn mjög sterku Framliði og sá endaði 10-18 Safamýrapiltum í hag. Þriðji leikurinn var gegn ÍR2 og var sá leikur í járnum allan tímann og var staðan 11-11 þegar skammt var til leiksloka en á endanum sigu Breiðhyltingarnir fram úr og unnu 12-16 sigur. Lokaleikur helgarinnar var gegn Gróttu2 og þar unnu Seltirningar 11-15 sigur gegn okkar fína liði.

Hópurinn var sáttur að venju eftir fína keppnishelgi þrátt fyrir að enginn sigur kæmi í hús enda er lykilatriði að bæta sig og hafa gaman með hópnum. Næsta mót hjá þessu liði er 1.-3.mars næstkomandi.

Myndirnar með fréttinni eru teknar í ferðinni.

Áfram Hörður! 
1. febrúar 2013 - Ingvar Örn Ákason

5.flokkur Harđar keppir fyrir sunnan

5.flokkur keppir á öðru móti vetrarins nú um helgina en hópurinn er að leggja af stað í þessum rituðu orðum. Fararstjórarnir Gunnar og Kristinn eru með allt klappað og klárt og strákarnir spenntir. Að þessu sinni fer aðstoðarþjálfarinn Axel með hópnum suður þar sem undiritaður er erlendis í augnablikinu.

Mikil stemmning hefur myndast í þessum flotta og kraftmikla hópi og það verður því klárlega mikið fjör hjá Axeli og félögum um helgina. Liðið leikur fjóra leiki, tvo á laugardag og tvo á sunnudag. Hópurinn fer saman í sund, horfir á mynd og svo bíða drengirnir spenntir eftir draugasögu þjálfarans sem aðalþjálfarinn lofaði upp í ermina á aðstoðarþjálfaranum án hans vitundar.

Leikjaplan liðsins á Ásvöllum í Hafnarfirði er eftirfarandi:

Laugardagur 2.febrúar

Hörður-HK3 kl. 12:00
Hörður-Fram kl. 13:20

Sunnudagur 3.febrúar

Hörður-ÍR2 kl. 11:20
Hörður-Grótta2 kl. 12:00

Bestu kveðjur á hópinn, áfram Hörður! 
1. febrúar 2013 - Ingvar Örn Ákason

Fréttir af 2.flokki - loksins heimaleikur!

2.flokkur Harðar leikur um helgina sinn fyrsta heimaleik í langan tíma og við vonum auðvitað að fólk láti sjá sig enda alltaf gaman að styðja liðin okkar áfram, öll sem eitt! Andstæðingurinn að þessu sinni er Víkingur og mun leikurinn hefjast kl. 14:30 á sunnudaginn í Torfnesi (Harpixhöllinni) og að sjálfsögðu er frítt inn!

Hörður-Víkingur kl. 14:30 sunnudaginn 3.febrúar 2013

Liðið lék um síðastliðna helgi tvo leiki á Íslandsmótinu en leikirnir fóru fram á höfuðborgarsvæðinu. Fyrri leikurinn var leikinn stuttu eftir komuna suður á föstudagskvöldi. Það sást nokkuð vel að keyrslan sat í mönnum þegar leikurinn hófst í Digranesinu gegn HK. Heimamenn gengu á lagið og hraðaupphlaupsmörk þeirra komu á færibandi. Þar var góðkunningi Harðar, Leó Snær Pétursson, fremstur á meðal jafningja enda toppeintak.

Leikurinn var erfiður í alla staði og endaði hann með 46-22 tapi þar sem leikar stóðu 20-12 eftir 30 mínútur. Laugardagsleikurinn í Austurbergi ÍR-inga var öllu betri viðureign í alla staði. Sævar var mættur á sinn gamla heimavöll og kann greinilega vel við sig í efra Breiðholtinu. Meiri barátta var í hópnum og menn voru greinilega hótelsvefninum fegnir því það var allt annað lið sem mætti til leiks að þessu sinni. Annar ósigur helgarinnar varð að lokum niðurstaðan en þó á köflum ágætis tilþrif. Lokatölur laugardagsins 35-23, heimamönnum í vil. 

Minnum enn og aftur á heimaleik helgarinnar og styðjum svo strákana til sigurs!

Áfram Hörður! 
24. janúar 2013 - Ingvar Örn Ákason

Elstu flokkarnir leika á Íslandsmótinu um helgina

2.flokkur leikur fyrstu leiki sína á árinu um helgina. Vonandi vegnar ţeim vel.
2.flokkur leikur fyrstu leiki sína á árinu um helgina. Vonandi vegnar ţeim vel.
2.flokkur og 4.flokkur Harðar halda suður um helgina og mun hvert lið leika 2 leiki í sinni deildarkeppni Íslandsmóts. 2.flokkur spilar kl. 18:30 á föstudagskvöld gegn HK í Digranesi og svo leika þeir síðari leik helgarinnar gegn ÍR kl. 13:30 í Breiðholtinu á laugardag.

4.flokkur heldur úti tveimur liðum og bæði lið leika tvo leiki um helgina. Fyrsti leikur helgarinnar er hjá Herði1 gegn HKR í Keflavík kl. 10:30 á laugardagsmorgun. Hörður2 spilar gegn HK2 í Digranesi kl. 14:00 sama dag. Planið er svo að kíkja í góða bíóferð áður en haldið verður snemma í beddann á Hótel Hafnarfirði þar sem liðið mætir í bítið í KR-heimilið en Hörður 1 á leik gegn KR kl. 09:00 á sunnudagsmorgninum áður en Hörður2 leikur gegn Aftureldingu kl. 12:00 í Mosfellsbænum.

Það er því nóg að gera og nóg um að vera hjá okkar elstu iðkendum og heimasíðan óskar öllum liðum góðs gengis og við hvetjum þá Vestfirðinga sem halda sig sunnar á landinu að kíkja á liðin okkar keppa. Leikjaplan helgarinnar má sjá hér að neðan:

Föstudagur

HK-Hörður kl. 18:30 í Digranesi (2.flokkur)

Laugardagur

HKR-Hörður1 kl. 10:30 í Keflavík (4.flokkur)
ÍR-Hörður kl. 13:30 í Austurbergi (2.flokkur)
HK2-Hörður2 kl. 14:00 í Digranesi (4.flokkur)

Sunnudagur

KR-Hörður1 kl. 09:00 í DHL-höllinni (4.flokkur)
Afturelding-Hörður2 kl. 12:00 að Varmá í Mosfellsbæ (4.flokkur)

Áfram Hörður!
 
19. janúar 2013 - Ingvar Örn Ákason

Handboltamaraţon 4.flokks

Ţađ verđur hart barist en eflaust oftast á bróđurlegan og jákvćđan hátt enda á gleđin ađ ráđa ríkjum á Flateyri ţennan laugardaginn. Mynd: Björn Baldursson
Ţađ verđur hart barist en eflaust oftast á bróđurlegan og jákvćđan hátt enda á gleđin ađ ráđa ríkjum á Flateyri ţennan laugardaginn. Mynd: Björn Baldursson
4.flokkur mun hertaka íþróttahúsið á Flateyri laugardaginn 19.janúar en þá fer fram handboltamaraþon flokksins. Maraþonið snýst um að í tólf klukkutíma, frá klukkan 10 um morguninn til 10 um kvöldið, mun handbolti vera spilaður í margvíslegu formi. Leikmönnum verður m.a. skipt upp í lið og leikinn verður hefðbundinn handboltaleikur. Inn á milli verða settar upp nokkrar handboltakeppnir, ýmist á milli hópa og einstaklinga.

Markmiðið er að hafa mjög gaman og standa sig fyrir alla styrkina sem fyrirtæki og einstaklingar á Ísafirði og í næsta nágrenni hafa lagt til handa leikmönnum flokksins. Frekari fregnir af maraþoninu komka eftir helgi og vonandi læðast nokkrar myndir af deginum langa inn á Facebook-síðu handknattleiksdeildar Harðar.

Áfram Hörður og takk fyrir stuðninginn öll.
14. janúar 2013 - Ingvar Örn Ákason

Góđ keppnishelgi ađ baki hjá 4.flokki Harđar

Hér sést Baldur í báráttunni í laugardagsleiknum. Myndina tók Björn Baldursson.
Hér sést Baldur í báráttunni í laugardagsleiknum. Myndina tók Björn Baldursson.
Bæði lið Harðar í 4.flokki, Hörður 1 og Hörður 2, öttu kappi gegn Aftureldingu í Torfnesi um helgina. Liðin eru í stöðugri framför og gaman að sjá til iðkendanna á þessum árstíma. Lið 1 vann öflugan 5 marka sigur á meðan lið 2 beið lægri hlut eftir frábæran fyrri hálfleik og átti líklega bestu spretti tímabilsins í fyrri hluta leiksins. Hörður 1 situr á toppi deildarinnar en liðið er enn ósigrað og hefur unnið fyrstu 7 leiki Íslandsmótsins. 

Hörður 2  16 - 24  Afturelding (10-10) 

Hörður 2 reið á vaðið á laugardeginum og lék gegn sterku liði Aftureldingar. Liðið byrjaði hálf sofandi og voru 1-6 undir eftir um 10 mínútna leik. Liðið ákvað að bæta sinn leik og voru allir leikmenn liðsins staðráðnir í að jafna metin fyrir hálfleik sem gekk að lokum eftir. Næstu 15 mínútur réðust af baráttu og dugnaði og hálfleikstölur voru 10-10 eftir frábæran kafla heimamanna. Síðari hálfleikurinn byrjaði af svipuðum krafti og sá fyrri endaði en það kom að lokum að þeim tímapunkti þar sem leikmenn misstu aðeins einbeitingu sem varð til þess að sterkt gestalið úr Mosfellsbænum sigldi fram úr á lokasprettinum og vann sanngjarnan 8 marka sigur, 16-24.

Margt jákvætt sem hægt er að taka út úr þessum leik fyrir framhaldið. Baldur Björnsson átti til að mynda sinn langbesta leik á tímabilinu og var að öðrum ólöstuðum besti leikmaður heimamanna en heildarvinnsla liðsins var annars mjög góð og eins og segir hér að ofan var 15 mínútna kaflinn í fyrri hálfleik sem kom liðinu úr 1-6 í 10-10 gjörsamlega frábær og gaman að sjá að liðið getur þetta ef leikmenn liðsins þora bara að hafa trú á sér sjálfum. Fyrirliðinn Dagur Ben (sem rétt náði að troða handboltaleiknum inn í dagskrá á milli skíðaferða) hefur hingað til farið mikinn í markaskorun en lét sér nægja að þessu sinni að leggja mikið upp fyrir liðsfélagana sem sýnir samheldnina og samvinnuna sem ríkir hjá Herði.

Markaskorarar Harðar 2 í leiknum:  Baldur 6, Arnór Gísli 5, Dagur 2, Julo Thor 2, Sigþór 1. Jón Ómar varði 8 bolta í markinu en það er fín 25% markvarsla.

Hörður 1  20 - 15  Afturelding (9-7)

Hörður 1 lék sinn leik á sunnudagsmorgninum. Liðið hefur átt í miklum erfiðleikum með leiki sem hefjast fyrri hluta dags og þessi var engin undantekning. Harðarpúkarnir höfðu þá yfir eftir 25 mínútna leik en staðan var 9-7 þegar gengið var til búningsherbergja. Leikmenn spýttu aðeins í lófana í síðari hálfleiknum og gerðu betur heldur en í þeim fyrri eins og rætt var um í hálfleiksspjalli hópsins. Lokatölur eftir flottan handboltaleik var 20-15 okkar mönnum í hag. 

Liðsmenn Harðar 1 náðu góðum köflum en duttu einstaka sinnum of langt niður og þar spilaði kannski aðeins inn í myndina að varafyrirliðinn Friðrik Þórir Hjaltason gat ekki beitt sér að fullu sökum meiðsla en hann er mikilvægt púsl í liðið. Heilt yfir var þetta ágætur leikur en fyrri leikur liðanna fyrir sunnan endaði með tveggja marka sigri okkar pilta. Sóknarlega vantaði aðeins upp á að fínpússa flæðið sem unnið verður í fyrir næstu verkefni en varnarlega vorum við oft fínir enda ekki annað hægt þegar liðið er svo heppið að hafa einn allra besta markvörð landsins, Jens Ingvar Gíslason, í búrinu fyrir aftan sig.

Markaskorarar Harðar 1 í leiknum: Gísli Jörgen 7, Daníel Agnar 6, Pétur 4, Hjalti Hermann 2, Eggert Karvel 1. Jens varði 17 skot í markinu en það gerir markvörslu upp á 53%. Glæsileg frammistaða það!

Við þökkum þeim sem mættu kærlega fyrir stuðninginn í stúkunni og vonandi sjá enn fleiri sér fært að mæta á næstu heimaleiki Harðar. Einnig þakkar liðið toppnáungunum Maroni og Sævari fyrir að standa trekk í trekk í dómgæslunni en svona á að vinna óeigingjarnt starf fyrir félagið og gefa af sér. Jón Hálfdán dæmdi með Sævari á laugardeginum og Salmar Már með Maroni á sunnudeginum. Allir dómararnir stóðu sig glimrandi vel og aldrei yfir þeim að kvarta (þrátt fyrir eina vinalega ábendingu undirritaðs til Salmars í einu atriði þarna á sunnudeginum). 

Við minnum enn og aftur á að allir krakkar á Ísafirði og nágrenni eru velkomnir á æfingar allra flokka og eru auðvitað sérstaklega velkomnir á meðan HM ævintýri Strákanna okkar stendur yfir.

Áfram Hörður! 
11. janúar 2013 - Ingvar Örn Ákason

HM í handbolta ađ hefjast - FRÍTT AĐ ĆFA!

Óli og Fúsi fagna hér sigri í undanúrslitum á ÓL 2008, medalía á Ólympíuleikum var ţar međ í höfn!
Óli og Fúsi fagna hér sigri í undanúrslitum á ÓL 2008, medalía á Ólympíuleikum var ţar međ í höfn!
Á meðan HM í handbolta stendur yfir á Spáni næstu vikurnar verður FRÍTT AÐ ÆFA hjá handknattleiksdeild Harðar! Við hvetjum því alla þá sem vilja prófa handboltann að láta slag standa og kíkja á æfingarnar sem fara allar fram í Torfnesi.

Ísland hefur leik laugardaginn 12.janúar gegn Rússum og hefst hann kl. 17:00 en hann er sýndur í opinni dagskrá á Stöð 2 Sport. Við hvetjum því alla til að horfa á Strákana okkar spila til sigurs gegn rússneska birninum sem áður fyrr var óvinnandi vígi fyrir víkingana okkar.

Æfingar 5.-6.bekkjar eru á miðvikudögum kl. 14:45, fimmtudögum kl. 14:00 og sunnudögum kl. 12:00.
Æfingar 7.-8.bekkjar eru á þriðjudögum kl. 14:45, fimmtudögum kl. 15:00 og sunnudögum kl. 13:00.
Æfingar 9.-10.bekkjar eru á mánudögum kl. 15:35, fimmtudögum kl. 16:00, föstudögum kl. 16:25 og sunnudögum kl. 14:00.
Æfingar menntaskólaaldurs eru á mánudögum og þriðjudögum kl. 19:40, fimmtudögum kl. 18:20 og föstudögum kl. 21:00.

STRÁKAR JAFNT SEM STELPUR, ALLIR VELKOMNIR AÐ PRÓFA ÆFINGAR FRÍTT Á MEÐAN HM STENDUR!

ÁFRAM ÍSLAND!
Eldri fćrslur

Fréttir

Vefir ađildarfélaga HSV

Vefumsjón