A A A
« Desember »
S M Ţ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Atburđir

4. mars 2014 - Ingvar Örn Ákason

Margt búiđ ađ gerast - enn meira framundan

5.flokkspúkar á ćfingu
5.flokkspúkar á ćfingu
Undanfarnar vikur hafa verið viðburðarríkar hjá handknattleiksdeild Harðar. 2.flokkur félagsins hefur staðið í ströngu og á dögunum lék liðið hörkugóða leiki í henni sólríku Reykjavík. Liðið hefur farið í tvær öflugar keppnisferðir þar sem sigur var loksins innan seilingar en allt kom fyrir ekki. Leikurinn gegn Víkingum í Fossvoginum fyrir skemmstu situr enn í hópnum. Liðið hafði eins marks forystu þegar nokkrar mínútur lifðu leiks og höfðu góðan séns á að komast tveimur mörkum yfir og þá líklega fara langt með leikinn en örlagadísirnar dönsuðu ekki okkar megin á því augnabliki. Sóknin til að jafna leikinn þegar 20 sekúndur voru eftir fór úrskeiðis og heimamenn refsuðu. Ótrúlega svekkjandi og leitt fyrir lánsmennina okkar, Stefán og Baldvin, að ná ekki að fagna sigri með strákunum en þeir settu liðið svo sannarlega upp á annað level.

Næsta verkefni 2.flokks og jafnframt síðustu leikir vetrarins eru helgina 11.-13.apríl þegar liðið leikur tvo leiki gegn ÍBV en leikirnir fara fram á hlutlausum velli á höfuðborgarsvæðinu. 

4.flokkur Harðar hefur leikið nokkra leiki undanfarið og er liðið enn að berjast til síðasta svitadropa í þessum hrikalega erfiðu leikjum efstu deildar árgangsins. Liðið nýtur því miður ekki sömu krafta og í fyrra en í liðið vantar fjóra byrjunarliðsmenn frá árangrinum sem náðist þegar liðið vann 2.deild Íslandsmótsins örugglega og kom sér þar með í hóp 8 bestu liða landsins. Heildin er þó öflug og liðsmenn staðráðnir í að nýta hvern leik og hverja æfingu til að bæta sig og vel hefur verið tekið á því að undanförnu.

Næsta verkefni 4.flokks er helgina 7.-9.mars næstkomandi eða um komandi helgi þegar liðið leggur land undir fót og leikur 3 leiki á skömmum tíma fyrir sunnan. Leikið er gegn Gróttu og tvisvar sinnum gegn Eyjamönnum. 

5.flokkur Harðar heldur á Íslandsmót í lok marsmánaðar sem verður lokamótaundirbúningur liðsins fyrir risastóra verkefnið sem mótið okkar verður 2.-4.maí næstkomandi þar sem allir Ísfirðingar, Bolvíkingar og nærliggjandi sveitungar, ætla að skella sér á gönguskíði og taka einnig þátt í flottri handboltahelgi. 

Minnum svo á stöðugan fréttaflutning á Facebook-síðu Harðar: www.facebook.com/hordur.isafjordur

Ein heild. Eitt lið. Hörður!
28. janúar 2014 - Ingvar Örn Ákason

Velkominn heim vinur!

Axel ađ skrifa undir félagaskiptin langţráđu
Axel ađ skrifa undir félagaskiptin langţráđu
« 1 af 2 »
Já ansi góðar fréttir að berast fréttastofunni í þessum rituðu orðum. Týndi sonurinn, Axel nokkur Sveinsson, er kominn heim. Hann hafði ákveðið fyrir tímabil að eiga gott lokatímabil hérna heima með 2.flokki eftir árspásu frá handboltaiðkun. Þegar sú ákvörðun hafði verið tekin kom þó á daginn að Ungmennafélagið Selfoss hafði áhuga á að fá pilt í sínar raðir. Úr varð að Axel hélt á suðurlandsundirlendið en eftir nokkurra mánaða dvöl þar á bæ vildi pilturinn snúa aftur til síns heima og klára tímabilið með stæl með Herði í nýjum og glæsilegum Harðarbúningnum frá Henson.

Axel krotaði undir félagaskiptapappíra í morgun og allt orðið klappað og klárt. Hann er loksins orðinn leikmaður Harðar á nýjan leik. Þess ber einnig að geta að Baldvin Fróði Hauksson og Stefán Pétur Gunnarsson eru á lánssamningi frá Val út leiktíðina en Valur getur þó kallað þá til sín aftur með viku fyrirvara fram til 1.mars næstkomandi.

Leikir helgarinnar
Það verður því gaman að mæta FH/ÍH næstkomandi sunnudag kl. 15:00 í Harpixhöllinni Torfnesi þar sem við ætlum að gera allt brjálað á pöllunum og vonandi gera góða atlögu að fyrsta sigri vetrarins í 2.flokki. Hörður mætir einnig FH í 4.flokki sama dag kl. 13:30. Það er því nóg um að vera, þvílík handboltaveisla og við hvetjum alla til að mæta og hvetja okkar menn áfram og bjóða Axel hjartanlega velkominn heim!

Við minnum svo enn og aftur á Facebook-síðu Harðar: www.facebook.com/hordur.isafjordur
Þar koma reglulega myndir úr starfinu og oft nánast í beinni enda fréttaritari síðunnar duglegur við að mynda athyglisverð móment sem verða á æfingum og í leikjum.

Ein heild. Eitt lið. Hörður.
19. janúar 2014 - Ingvar Örn Ákason

Leikir 2.flokks og 4.flokks

Markaskorarar Harđar í 2.flokki
Markaskorarar Harđar í 2.flokki
« 1 af 2 »
2.flokkur Harðar lék gegn Víkingi síðastliðinn föstudag en Víkingarnir mættu sprækir í þennan leiðangur, keyrðu fram og til baka samdægurs fyrir leikinn. Harkan sex í gangi þar á bæ. Leikurinn var í járnum fyrstu 20 mínúturnar þar til Reykjavíkurliðið náði yfirhöndinni í leiknum og voru 12-19 yfir í hálfleik. Bæði liðin gáfu í sóknarlega í síðari hálfleik og enduðu leikar 29-45. Harðverjar eru alltaf að skora nóg í sínum leikjum að því gefnu að hitt liðið skori ekki endalaust af mörkum í bakið á okkar mönnum, sem þó því miður allt of oft virðist vera raunin. 

Reynslulitlir markmenn 2.flokks stóðu sig þó vel í leiknum. Matteo Ducoli, skiptineminn frá Ítalíu sem aldrei hafði æft handbolta fyrir þetta tímabil (ég er ekki einu sinni viss um að hann hafi séð handboltaleik áður en hann kom), er að reynast okkur vel og aðlagast vel innan hópsins. Stendur sig vel á æfingum og er að koma vel út úr síðustu leikjum. Hann varði skv. Lenu skýrsluritara 6 skot og Einar Viðar kom inn með fína innkomu og tók 2 skot. Eitt skot varði hann síðan mjög vel, en boltinn fór upp í loft í nokkrar sekúndur, skoppaði innan teigs og skrúfaðist inn, hreint ótrúlegt atvik.

4.flokkur Harðar lék gegn Fram á laugardag og eru menn að aðlagast breyttum hóp þessi misserin sem tekur tíma en vonandi ná menn að gela sig í gang á lokasprettinum til að hirða nokkur vel valin stig. Jens er mættur aftur í markið og munar um minna þar. Hálfleikstölur voru 9-22 og lokatölur 18-35. Vörnin varð aðeins betri í síðari hálfleik og Jens var frekar heitur í rammanum. Hann endaði á að taka 16 bolta sem er vel gert. 

Markaskor leikmanna Harðar má sjá á meðfylgjandi skýrslum sem fylgja með fréttinni. Þangað til næst.

Áfram Hörður!
17. janúar 2014 - Ingvar Örn Ákason

Gísli Jörgen, Jón Ómar og Birkir á úrtaksćfingum HSÍ

Gísli Jörgen Gíslason, tilnefning Harðar til íþróttamanns Ísafjarðarbæjar fyrir árið 2013, tók um síðastliðna helgi þátt í flottum úrtaksæfingum HSÍ fyrir 1998 árganginn. Þar voru mættir 36 vaskir piltar í ýmis konar test og til að taka vel á því á handboltaæfingum. Gísli stóð sig vel á æfingunum og kom vel út úr prófunum.

Bróðir Gísla, Jón Ómar Gíslason, fer núna um helgina á úrtaksæfingar fyrir 2000 árganginn ásamt liðsfélaga sínum Birki Eydal. Þeir félagar taka þátt í fjórum flottum handboltaæfingum um helgina og ná vonandi að bæta góðri reynslu í bankann góða. Piltarnir eru glæsilegir fulltrúar Harðar og verður gaman að fylgjast með framvindu mála.

Ein heild. Eitt lið!
15. janúar 2014 - Ingvar Örn Ákason

Handboltaátak HSÍ- komdu í handbolta - FRÍTT!

Handknattleikssamband Íslands stendur fyrir ţessu flotta átaki međ öllum liđum landsins
Handknattleikssamband Íslands stendur fyrir ţessu flotta átaki međ öllum liđum landsins
Við gefum heimasíðu HSÍ orðið.

"Núna er EM í handbolta byrjað og stendur yfir næstu tvær vikur. Handknattleikssamband Íslands stendur nú í annað sinn fyrir átakinu “Komdu í handbolta” þar sem öllum börnum er boðið að æfa handbolta í ákveðinn tíma hjá öllum félögum án þess að þurfa að borga fyrir það. Með þessu átaki erum við að reyna að auka áhuga barna á handbolta og við vitum að ein besta leiðin til þess, er að fá íþróttakennara til að vinna með okkur.


HSÍ hefur því fengið íþróttakennara í grunnskólum landsins í lið með sér, til að auka áhuga nemenda á handbolta, með því að fá íþróttakennarana til að vera með handboltaþema í kennslunni hjá sér á meðan á EM í handbolta í Danmörku stendur.

Ef áhugi á handbolta kviknar hjá krökkunum í íþróttatímunum, þá aukast líkurnar á að þau byrji að æfa handbolta hjá félögunum og það er það sem við viljum. Hjá félögunum eiga þau að fá góða þjálfun sem bæði þroskar þau og gerir þau að betri handboltamönnum. Íþróttakennarar munu hvetja áhugasama nemendur til að fara á æfingar hjá sínu félagi.

Við viljum hvetja þá krakka sem áhuga hafa á að prófa að æfa handbolta til að mæta á æfingar hjá félaginu í sínu hverfi og við lofum að það verður tekið vel á móti þeim."

Við hjá Herði erum engin undantekning og bjóðum að sjálfsögðu uppá fríar æfingar út janúarmánuð meðfram þessu flotta framtaki sambandsins sem við styðjum heilshugar. Æfingarnar eru sem hér segir:

Krakkar í 5.-7.bekk (æfingar í Torfnesi fyrir utan laugardagsæfingar)
miðvikudagar kl. 17:20-18:20
föstudagar kl. 15:00-16:00
laugardagar kl. 10:00-11:00 (Bolungarvík)
sunnudagar kl. 12:00-13:00

Krakkar í 8.-10.bekk (æfingar í Torfnesi fyrir utan laugardagsæfingar)
mánudagar kl. 16:25:17:20
miðvikudagar kl. 18:20-20:00
föstudagar kl. 16:00-17:20
laugardagar kl. 10:00-11:00 (Bolungarvík)
sunnudagar kl. 13:00-14:00

Menntaskólaaldur (allar æfingar í Torfnesi)
mánudagar kl. 18:40-20:20
þriðjudagar kl. 19:40-21:00
miðvikudagar kl. 18:20-20:00
föstudagar kl. 16:00-17:20
sunnudagar kl. 13:00-14:00

Allir að mæta í handbolta á Ísafirði og í Bolungarvík - handbolti er skemmtilegur!

6. janúar 2014 - Ingvar Örn Ákason

Gísli Jörgen Gíslason valinn handknattleiksmađur Harđar - tilnefndur til íţróttamanns Ísafjarđar fyrir áriđ 2013

Gísli Jörgen. Mynd fengin af fésbókarsíđu Gísla Jörgens.
Gísli Jörgen. Mynd fengin af fésbókarsíđu Gísla Jörgens.
Gísli Jörgen er duglegur piltur með mikinn metnað. Gísli er ungur að árum en hann er 16 ára og í 10.bekk Grunnskólans á Ísafirði. Hann mætir á allar æfingar og æfir eins mikið aukalega og kostur er. Gísli Jörgen er í U16 landsliðsúrtaki fyrir 1998 árganginn. Gísli Jörgen sem leikur stöðu vinstri skyttu hjá Herði gegnir lykilhlutverki hjá 4.flokksliði félagsins ásamt því að spila einnig mikið með 2.flokki.

Gísli Jörgen fór fyrir flottu 4.flokksliði Harðar síðastliðinn vetur, 2012-2013, sem vann 2.deild Íslandsmótsins og komst þar með í 8-liða úrslitakeppni um Íslandsmeistaratitilinn þar sem einungis bestu lið landsins öttu kappi. Liðið beið lægri hlut gegn ÍBV á útivelli í Vestmannaeyjum sem svo nokkrum vikum síðar varð Íslandsmeistari. 
 
Gísli Jörgen á framtíðina fyrir sér og verður spennandi að sjá handboltaframtíð þessa unga og efnilega pilts.


17. desember 2013 - Ingvar Örn Ákason

Öllum leikjum lokiđ fyrir jól - jólamjúkboltamót 18.desember

Markaskorarar Harđar gegn Gróttu
Markaskorarar Harđar gegn Gróttu

4.flokkur Harðar lék lokaleik sinn árið 2014 síðastliðinn sunnudag þegar liðið tók á móti Gróttu. Leikurinn var liður í deildarkeppni þeirra bestu á landinu í eldra árs keppni 4.flokks. Heimamenn sáu aldrei til sólar og ljóst er að á meðan við leikum markmannslausir (Jens markvörður meiddur) þá verður róðurinn erfiður. Leikmenn gáfu kraft í verkefnið en það virtist aldrei duga og aldrei var liðið nálægt sínu besta, hvorki í sókn né vörn.

Lokatölur voru 41-16 í erfiðum leik. Jakob Jóhann Veigarsson var að leika sinn síðasta heimaleik fyrir félagið í bili að minnsta kosti en hann fluttist suður fyrir Steingrím beint eftir leikinn. Hann heldur alla leið í Hafnarfjörðinn en mun áfram leika með Herði út leiktíðina, útileikina í það minnsta og vonandi einhverja heimaleiki. Jakob er piltur góður og við óskum honum alls hins besta í sínum verkefnum á næstunni.

Lokahnykkurinn fyrir áramót verður jólamjúkboltamót í Torfnesi miðvikudaginn 18.desember frá kl. 17:20-19:45. Öllum flokkum skipt í ca. 8-10 lið þar sem leikið er í blönduðum liðum. Leikið verður í tveimur riðlum og svo leikið til úrslita. Eftir mótið halda yngri flokkarnir til ógeðisdrykkjarkeppni (ala Auddi og Sveppi) og að lokum horft á jólamynd.

Handknattleiksdeildin hefur svo störf sín á nýjan leik eftir myndarlegt jólafrí í byrjun janúar.

 

Gleðilega hátíð og þökkum árið sem er að líða.

Ein heild. Eitt lið. Hörður!

3. desember 2013 - Ingvar Örn Ákason

Bikarleikur 4.flokks og frestađur deildarleikur

Markaskorarar Harđar í bikarleiknum
Markaskorarar Harđar í bikarleiknum
Síðastliðinn föstudag lék 4.flokkur Harðar flottan bikarleik gegn Fram í Harpixhöllinni að Torfnesi. Leikurinn fór fram á frekar óhefðbundnum tíma eða kl. 14:30. Leikurinn var í járnum allan tímann þó að gestirnir úr Safamýrinni hafi haft frumkvæðið nær allan leikinn. Þegar 4 mínútur lifðu leiks tókst okkar mönnum þó að ná forystunni, 21-20. Gestirnir settu þá í lás og skoruðu síðustu 4 mörk leiksins, lokatölur 21-24 í hörkuleik eftir að staðan hafði verið 10-12 í hálfleik.

Þetta var miklu betri leikur en allir þeir sem liðið hefur spilað í deild hinna bestu á leiktíðinni. Harðarpúkaneistinn og glampinn sást langar leiðir og baráttan var svo sannarlega til staðar. Þetta var allt annað lið en hefur mætt til leiks að undanförnu. Vonandi er þetta það sem koma skal í næstu verkefnum en næsta slíka verkefni átti einmitt að vera strax á sunnudeginum en sökum ófærðar í flugi komst Afturelding ekki á svæðið. Þeim leik hefur verið frestað um ótilgreindan tíma. Lokaleikur Harðar fyrir áramót verður því sunnudaginn 15.desember gegn Gróttu en leikurinn verður í Torfnesi á Ísafirði.

Fjölnir Baldursson mætti og tók leikinn upp og þökkum við honum hér með kærlega fyrir það fína framlag. Hér er svo linkur á samantektina: http://www.youtube.com/watch?v=Nbjb0ofC_Pg  

Við minnum að lokum jafnframt á Facebook-síðu Harðar en á henni má finna myndir úr ferðum flokkanna, örfréttir og fleira sniðugt. Endilega kíkið á það.

Áfram Hörður!
24. nóvember 2013 - Ingvar Örn Ákason

5.flokkur yngri á sínu fyrsta móti

5.flokkur yngri hjá hkd Harđar. Efri frá vinstri: Georg, Ásgeir, Ţráinn, Guđmundur, Ívar, Ingvar. Neđri frá vinstri: Jakob, Ţórđur, Hlynur, Sindri. Liggjandi: Helgi.
5.flokkur yngri hjá hkd Harđar. Efri frá vinstri: Georg, Ásgeir, Ţráinn, Guđmundur, Ívar, Ingvar. Neđri frá vinstri: Jakob, Ţórđur, Hlynur, Sindri. Liggjandi: Helgi.

Það voru glaðir piltar sem héldu suður í keppnisferð síðastliðinn föstudag. Leiknir voru fjórir leikir um helgina og voru leikirnir gegn Víkingum og ÍR-ingum virkilega flottir þar sem sigur vannst gegn Breiðhyltingunum. Leikirnir gegn Selfossi og Haukum voru erfiðari en jákvæðir hlutir í öllum leikjunum. Nokkrir piltanna að leika á sínu fyrsta handboltamóti.

Mikil stemning ríkti alla ferðina en undirritaður ásamt Simba í Hafnarbúðinni gerðu allt sitt besta til að halda stuðinu gangandi. Reyndar gerðu sprungið dekk, Hunger Games, óþjónustan á Pizza Hut, draugaleiðangurinn, stökkbrettabíóið, sundkarfan, Laugavegsrúnturinn, Dive.is heimsóknin, Perlan og fleira, sitt til að halda hópnum sjálfkrafa hressum og kátum.

Lykilatriði að halda þessu skemmtilegu og líflegu frá fyrstu til síðustu sekúndu. Flottur hópur og meðfylgjandi er hópmynd af liðinu sem tekin var af Simba í Hafnarbúðinni laust fyrir kl. 09:00 í morgun! Mótið fór fram í Strandgötu og að Ásvöllum en mótshaldarar voru Haukar.

Fleiri myndir frá ferðinni verða aðgengilegar á Facebook-síðu Handknattleiksdeildar Harðar: www.facebook.com/hordur.isafjordur 

24. nóvember 2013 - Ingvar Örn Ákason

Bikarćvintýrinu lokiđ ađ sinni - til hamingju Selfyssingar

Skýrslan úr bikarleiknum
Skýrslan úr bikarleiknum
Bikarævintýri Harðar í meistaraflokki karla er lokið að sinni en liðið beið í dag lægri hlut, 21-44, gegn 1.deildarliði Selfoss. Hálfleikstölur voru ekki svo slæmar en heimamenn höfðu skorað 13 mörk gegn 21 marki frá sterku liði gestanna. 

Betra liðið fór áfram en Harðverjarnir lögðu meira upp úr skemmtanagildinu jafnframt því sem menn reyndu að taka vel á piltunum frá suðurlandinu. Okkar maður, Axel Sveinsson, leikur með Selfyssingum í vetur og stóð sig gríðarlega vel í þessum leik. Gaman að sjá okkar mann standa sig með þessum hætti á slíku leveli.

Samkvæmt leikskýrslu leiksins skoraði Sigfús markmaður 2 mörk en það má leiða líkur að því að mörkin eigi að vera á Lárusi boxara nokkrum. Allir sem spiluðu í dag stóðu sig vel og gerðu sitt til að halda gestaliðinu í skefjum. Eitthvað misskildi Bragi meðlagsformaður þau skilaboð þegar hann hamraði boltanum í smettið á liðsfélaga sínum, Jóni Sigmunds. Jón stóð þessa óvæntu árás af sér. 

Það tók verulega á að fá þennan leik til að fara fram en gott að geta boðið Selfyssinga loksins velkomna. Piltarnir sem mættu fyrir hönd gestanna algjörir heiðursmenn fram í fingurgóma og dómarar leiksins, Bjarki og Gunnar, ekki síðri. Þökkum öllum hluteigandi aðilum fyrir leikinn og óskum jafnfram Selfyssingum til hamingju með sigurinn sem og góðs gengis í næstu umferð.

Markaskorara má sjá á meðfylgjandi mynd.

Áfram Hörður!
Eldri fćrslur

Fréttir

Vefir ađildarfélaga HSV

Vefumsjón